ئاهەنگی پیرۆزکردنی ٨ی مارس کە ئەمڕۆ لە بەردەقارەمان بەڕێوەچوو کۆتاییهات
ئەمڕۆ بەدروشمی (کات کاتی ژنی ئازاد و پاراستنی کۆمەڵگایە، بەیەکڕیزیی ژنان توندوتیژیی و داگیرکاری تێکدەشکێنین)، ڕێکخراوی ژنانی ئازادی کوردستان (ڕژاک) لەسەیرانگای بەردەقارەمان سەر بە پارێزگای سلێمانی، ئاهەنگی ٨ی مارس، ڕۆژ جیهانی ژنان بەڕێوەچوو
ئاهەنگەکە بەئامادەکاریی ڕێکخراوی ژنانی ئازادی کوردستان و بەبەشداری هونەرمەندان (شەهێن تاڵەبانی، نیان عەبدوڵا، شنیار نەجیب) بەهاوکاری گوروپی میوزیکی (شەهید ڤەژین، شەهید ڤیان، شەهید سەرحەد) هەروەها ئاهەنگ و هەڵپەڕکێی گروپی هەڵپەڕکێی شەهید دەستینا بەڕێوەچوو
ژمارەیەکی بەرچاو لەژنان بەشداری ئاهەنگەکە بوون لەشوێنی ئاهەنگەکە وێنەی عەبدوڵا ئۆجەلان، ڕێبەری گەلی کورد و شەهید ساکیناجانسز و ڤیان سۆران و چەندین شەهیدی دیکە هەڵواسرابوون
لە سەرەتای ئاهەنگەکەدا وتاری ڕێکخراوی ژنانی ئازادی کوردستان (ڕژاک) لە لایەن ژینۆ ڕەشیدە،وە خوێندرایەوە، کە تێیدا هاتبوو: سیستمی دەسەڵاتداری بەهەموو جۆرێک ژن دەکەنە کۆیلە و لەبەرژەوەندی خۆیان بەکاری دەهێنن بەشێوەی جۆراوجۆر، لەبەرامبەر ئەو سیستمە تاریکەدا خۆڕاگری و فراوانی بەرخۆدانی ژنان فراوان دەبێت، خەریکە دەگاتە ئەو ئاستەی کە ئیتر ژن هیچ دەسەڵاتێک ناتوانێت ببێتە کۆسپ لەبەردەم تێکۆشانیدا
پاشان وتاری تەڤگەری ئازادی کوردستان، لەلایەن هاوسەرۆکی هەرێمی سلێمانی تەڤگەری ئازادییەوە خوێندرایەوە و تیایدا باسی لە تێکۆشان و هەوڵدانی ژنان کرد لەپێناو ئازادیدا، هەروەها ئەو دەستکەوتانەش بە گرنگ دەزانێت کە ژنان بە هەوڵ و ماندوو بوونیان بەدەستیان هێناوە
دواتر لەلایەن گروپێکی شانۆیی گەرمیانەوە شانۆگەرییەک پێشکەش بە ئامادەبووان کرا، ناوەڕۆکی شانۆگەرییەکە پێکهاتبوو لە مەینەتییەکانی ژن و ژیانی کۆڵبەری و خۆ دەربازکردن لە کۆت و بەندەکانی کۆمەڵگە
دوابەدوای ئەوە هونەرمەندان ئاهەنگەکەیان بە گۆرانی و هەڵپەڕکێ بەجۆشترکرد
هەر لەچالاکیەکەدا پێشانگایەک بۆ کتێبی ژنۆلۆژی و چەند کتێبێکی سەرۆکاییەتی ئامادە کرابوون
ئاهەنگەکە بڕیاربوو ڕۆژی هەینی، ٥ی ئازار بەڕێوە بچێت، بەڵام لەبار نالەباری کەش و هەوا خرایە ئەمڕۆ
